• Share this page to Facebook
  • Share this page to Twitter
  • Share this page to Google+
Mō Aotearoa

View this page in English

Ingoa Māori: Aotearoa

Tāone matua: Te Whanganui-a-Tara

Tāone tino nui: Tāmaki Makaurau

Ngā reo whaimana: Ingarihi, Māori, Te Reo Rotarota o Aotearoa

Taupori: 4,509,700 (whakatau tata Pipiri 2014)

Horahanga: 268,107 km pūrua

Moni: Tāra o Aotearoa

Kāwanatanga: Manapori whai Pāremata

Tirohia hoki te 'Population Clock'

Ngā rōpū mātāwaka (ngā whakatau tata i te 30 o Pipiri 2013)1

Image, ethnic groups te reo.

Tirohia ngā raraunga mō 'ethnic groups'

Tirohia hoki '2013 Census ethnic profiles'

Taiao tūturu

He āhua ōrite te nui o Aotearoa ki Piritene Nui. Kāore he wāhi neke atu i te 130km te tawhiti mai i te moana. Nā tōna noho i te Tapa o Te Moananui-a-Kiwa, he puia ō Aotearoa, me te rū whenua. He hātai ngā āhuarangi, ahakoa he āhua pārūrū ngā rangi o Te Tai Tokerau i te raumati (Hakihea–Poutūterangi), ā, i ngā wāhi tuawhenua o Te Wai Pounamu e tino kaha ana te hukapapa i te takurua (Pipiri–Hereturikōkā). He ahurei ngā tipu me ngā manu tūturu, pēnei i te kiwi, ā, ko te pekapeka anake te whāngote noho whenua tūturu o konei.

Hītori

I tae mai ngā Māori ki Aotearoa mā runga waka mai i te rāwhiti o Poronïhia i te tōmuringa o te rautau 13. I te tuatahi I noho rātau i roto i ngā rōpū whānau, i ngā hapori rānei. I te tau 1642 ko te kaihōpara Tātimana a Abel Tasman te tangata Uropi tuatahi i tae mai ki Aotearoa. Mai i te tau 1769, i maheretia e te kaiwhakatere Ingarihi a James Cook te ākau o te motu. I te tau 1840, e 500 ngā rangatira Māori me ngā māngai o Kuini Wikitōria i haina i te Tiriti o Waitangi. Ka taka a Aotearoa ki raro i te maru o Piritene, ā, ka tīmata te taetae mai o ngā tauiwi. Engari, i takahia e te kāwanatanga i ētahi wā ngā oati tiaki i ngā tika Māori, ka pupū ake ngā pakanga i waenga i ngā iwi Māori me ngā hōia o Piritene i muri i tēnei, ka murua te nuinga o ngā whenua o te Māori. I te tau 1893, ko Aotearoa te whenua tuatahi i āhei ai te wahine ki te pōti. Ko te nuinga o ngā tāngata Māori o Aotearoa i whawhai i ngā pākanga i tāwāhi, tae atu ki ngā pākanga o te ao e rua o te rautau 20. Mai i te tau 1970, e whakariterite ana te kāwanatanga i ngā whakataunga me ngā iwi Māori – hei whakarite i ngā takahitanga o mua i Te Tiriti o Waitangi. I tēnei rā he whenua motuhake, takenga tini o Te Moananui-a-Kiwa a Aotearoa.

Ōhanga

He ōhanga mākete tō Aotearoa. I roa te wā i ahu mai ai te nuinga o ngā moni whiwhi ā-tau mai i ngā hua pāmu, pēnei i te wūru me ngā hua miraka kau. Ko ngā whakawhanaketanga o ēnei rā pēnei i te tapoi, te whakaputa whitiāhua, me te mahi waina he nui. He kaha te whakawhirinaki o Aotearoa ki ngā tauhokohoko ā-ao, ina koa me Ahitereiria, Haina, Te Kotahitanga o Uropi, me Te Hononga o Amerika. Mai i te tau 1980, i whakatuwherahia te mākete e ngā whakatikatikatanga ōhanga o Aotearoa hei turaki i ngā tauārai ki ngā haumitanga o tāwāhi.

Hapori

He āhua rite te rahi o te taupori o Aotearoa ki tō Airangi. He tokomaha ake ngā tāngata e noho ana ki Te Ika-a-Māui i a rātau e noho ana ki Te Wai Pounamu, ā, ko te nuinga e noho ana ki ngā tāone. Ko Tāmaki Makaurau, te tāone tino nui rawa, te kāinga o ngā iwi maha o Te Moananui-a-Kiwa me Āhia i tau mai ki konei mai i te tau 1950. E hāpai ana te kāwanatanga manapori i ngā kura, ngā whare wānanga me ngā hōhipera, nā reira kua whai mātauranga, whai hauora hoki te nuinga o ngā tāngata o Aotearoa, heoi anō he pai hoki te oranga.

Ahurea

Ko ngā tikanga o te ao Māori ko te puoro me te kanikani, te whakairo, te raranga, me te kōrero pūrākau. I heria mai anō e ngā kaiheke ā rātau ake mahi toi me ā rātau ake tikanga mai i te tau 1840. I muri mai ka tāpirihia mai e ngā kaiheke ngā tikanga o Te Moananui-a-Kiwa, Āhia, me ētahi atu tikanga ki te ahurea o Aotearoa. He tino nui ngā mahi whakaora i te reo me ngā tikanga Māori mai i te tekau tau atu i 1970. He maha ngā kaipuoro, kaituhi me ngā kaitoi ā-kite, whakaari hoki o Aotearoa kua mōhio whānuitia i tāwāhi.

I whakahoutia i Poutūterangi 2015

  • Share this page to Facebook
  • Share this page to Twitter
  • Share this page to Google+
Top
  • Share this page to Facebook
  • Share this page to Twitter
  • Share this page to Google+